fbpx
 

Safar Nama – Madaklasht(Chitral) main snowboarding ka experience Samar Khan ki zuban main…

March 3, 2019by hoMusk34

Raat 11bje apna snowboard or bagpack liye G9, Islamabad k adday pe gaari ka intezar kr rahe thi, halki barish b thi or Feburary mein kafi thhand b hoti hai. ‘Sameer’ jo k saray group ko jama kr raha tha achanak aya or aik coaster ki taraf le gya jis mein NUST k kafi students mojood thay. Gari k andar bait’tay he aik or adventurer ‘Wajahat Malik’ se b mulaqat hui jo apne sports or behtareen documentaries bnanay ki wja se jannay jatay hain.

Puri bus mein hum 2 khwateen thi or zyada tar logo ka taluq Dir or Chitral se tha. Bus raat 12bje rawana hui or jese jese hm agay barhtay gae, thhand barhti gae. ‘Dargai’ se chae peenay k baad mein ne aik participant se kambal pakkra or sogae kyu k aglay din bhot zyada activities thi. Subha 7 bje aank k’huli to ‘Lowaari tunnel’ k aas paas kahin hmari coaster tyres pe chain lga rahi thi ta k baraf pe chal skay. Subha 11 bje k kareeb ham Darosh pohanchay, jo Chitral city se takreeban 29 km door hai. Wahan sb ne Islamabad se Janay walay mehmaano ka pur josh istaqbaal kiya or bht aala naashta pesh kiya jis mein desi anday or Chitrali parathay bht mazay k thay.

Sb participants se mil k andaza hua k zyada tar log meri trah ‘Hindukush snow sports festival’ mein Skiing ya Snowboarding krne ae thay. Is festival k organizers, ‘Hashaam Ul Mulk’ or ‘Shabir Ishaq’ ka ta’luq Chitral se tha jo pehli dfa chitral mein aisi koi taqreeb kranay ja rahe thay. Jeeps anay k baad hm sb Madaklasht k liye rawana hue, jo Darosh se takreeban 4 ghantay door tha. Darosh se hmay 6 khwateen ne join kiya jin k ta’luq b Chitral se tha. Pahar k kinaray pe one-way road jo baraf se Dhaka hua tha, or jb tyres phisaltay thay to tb sb k moun se Kalmay shuru hojatay. Madaklasht pohanchay to shaam horahi thi, or dhalti hui dhoop mein safaid waadi or darakht aik angrezi season, ‘Game of Thrones’ ka scene lg rahe thay. Sakht sardi ki wja se jitney kapray le k gae thi, sb pehn liye or 3,4 layers se khud ko cover kiya. Aise mokay pe ‘wind-breaker’ jacket or trouser sb se barri blessings hote hain.

Madaklasht k aik maqami ghar mein hm larkiyo ki rihayish rakhi gae, jin k zyada tar afraad shehro mien thay or ghar pe sirf saas or bahu, 2 bacho k sath rehti thi. Shadeed sardi mein jb kamray k andar aik konay mein lakrriya jalti dekhi to dil khush hogya, kyu k andar ka temperature bht garam or aram deh tha. Chitral or Hunza ka tarz e zindagi kafi milta hai, kyu k dono lifestyles mein floor setting or central heating ka bht acha trend hai. Raat aram se soe or agli subha khud ko Pakistan ki haseen tareen waadi me paya, kyu k saaf sunny weather tha or logo ka hujoom jo Ski or Snowboarding race dekhne ae thay. Madaklasht me maqami logo ne aik slope bnai thi, jis par race honi thi or local media ka sath kuch government official b ae thay. Gilgit, Chitral or Islamabad k participants ne tayaari shuru ki, ye dekh k boht hurt hui k Madaklashi k bachay or jawan, lakrri k bnay hue aam se ski or bghair kisi quality kit k participate kr rahe thay. Mein ne b apna snowboard nikala or aik chhoti slope se start kiya, koi idea nahi tha k kese krna hai bs boots or bindings baandhay, jese he board pe k’hari hui us ne speed pakar li; or koi 7 foot k faslay k baad mein gir gae. Teen chaar dfa girnay k baad pta chala k masla girna nahi, bl k girnay k baad uth’na hota hai. Kyu k dhoop se baraf bht naram hogae thi or pura baazu andar chala jata tha.

Wahan chair lift ki fascility b nahi thi, kyu k pehli dfa aisa koi event rakha gya tha is liye neechay se upper hike kr k jana partha tha. Takreeban 40 se 50 dfa girnay k baad andaaza hua k shaam hogae hai or jb wapis kmray me ae to pta chala k skin b burn hogya hai or injuries b hui hain. Medicine kha k sogae ta k next day k liye tyaar rahe. Lekin aik ghantay baad he darwazay pe dastak hui or aik invitation mila, paas he aik local school gae to andar se music ki awaz aarahi thi. Andar ja k dekha to pura haal musicians se full tha, jis mein Rabab, Chitrali Sitaar or dusray local instruments k players mojood thay. Puri raat Chitrali or Pashto songs pe maqaami log raqs krte rahe or is event ko celebrate krte rahe. Aglay din bht zyada thhand or snowfall horahi thi or ussi snowfall me kuch or muqablo k baad closing ceremony hui, jis pe winners ko prizes mile or interviews hue.

Madaklasht bht khush or khoobsurat lag raha tha, or snowfall k baad to kisi fairy land ka ehsas horha tha wahan. Door paharon mein ghar, or unse nikalta hua dhuwan, bacho k surkh gaal or unki hansi hamesha yaad aati rahay ge. Aik khwahish hai, k un bacho k sports or Ski ka equipment sponsor hojae ta k wo professional sports me ja k Pakistan ka naam roshan kr skay.

Ye tha Samar Khan ka Madaklasht me snowboarding ka adventurous Safar Nama. Thank You Samar Khan for sharing your experience with us.