Jummay ki sham office ki kursi par chaye ki garam piyali hath main pakray ye soch raha tha k kal chutti wale din kuch mukhtalif karta hn. Tu apne ik dost Waseed ko phone lagaya, kafi lambi discussion k bad hum is natijay par puhanchay k Gujranwala ja kar pehlwano k shehr se acha sa nashta karte hain. Ye plan muje kafi munfarid or dilchasp laga. Aik or dost Anns or apne aik sir Furqan ko bhi sath lia or plan done kr lia. Is plan ki khabar humne apne Gujranwala main rehne wale dost Shuja ko di. Usne is plan ko second kia magar usme aik tabdeeli kar di, wo kia thi? Shuja ne Abbottabad main rehne wale humaray aik dost Abdul Rehman ki trf janay ka plan bnaya. Khush qismati se sab razi hogay, agay kia howa suniye…
Subha 6 bje ka wakt tha, Sir Furqan apni chamkti hoi cultus gari liye hum sb ko pick krne flat puhanch gay. 06:30 par Lahore se via Gt road Gujranwala k liye rawana howe. Taqreeban 2:30 ghntay bad apni pehli manzil yani Gujranwala puhnchay or Amratsri Harisa jo k shehr k androon me waqiya he, se behtreen nashta kia. Nashtay main olive oil or desi ghee se tayar howa laziz harisa, chaati wali namkeen lassi or badami tillon wale special kulchay the. Nashta krne k bad hum Gt road se he Abbottabad k liye rawana howe. Safar ka zaroori saman yani snacks wagra le liye. Is safar k dooran main apnay mobile k camera se apnay pehle vlog ko shoot krta raha, jo is blog k nichy mil skta he. 6 ghntay ki musalsal drive k bad hum Abbottabad puhanchay. Abdul Rehman ne wahan chaye ka intizam kar rkha tha. Chaye k bad hum Balakot Bissian Gaoun k liye nikle. Sir furqan jo musalsal drive kar k ab himat har chukay the, tu drive krne k liye Abdul Rehman ne haami bhari kun k wo un roads par drive krne main kafi maharat rkhta ha. Hum jo pehle he 5 log the tu Abdul Rehman k bad 6 ho chukke the, gari aik thi magar iraday mazboot the. 2 log agli passenger seat pr bethe unme se aik main tha.
Qareeb rat k 10 bje hum bissian gaoun puhanch gay. Abdul Rehman k chnd jan’nay walon ki trf stay kia. Unho ne humaray liye khanay main laziz qorma, biryani or sabzi ka salan tayar krwaya or rehne ka behtreen intizam kia. Maloom howa k is chotay se gaoun main rehne wale logon k dill shaid k2 ki pahari se bh baray the, asa manzar baray shehron main rehne wale logon main bohat kam he dekhne ko milta ha. Sonay lagay tu taiz barish shoro hogai jo subha tak jari rahi. Pur sakoon or dil-fareb waadiyon main is taiz barish ki ‘ghan garaj’ k nazaray ne sari thakan utar di. Is trip ki jo sb se khaas bat thi, wo ye k humne is trip par bohat munfrid tariqay se bbq ka set up kia jis ka zikar agay kron ga.
Subha uthe, nashta kia, Bbq ka chicken or chnd zaroori saman le kr Kaghan ki trf rawana howe. Halki halki barish or paharon par mojood badloon ki safaidi ne is manzar main khoo janay par majboor kr dya.
Kaghan main parne wali baraf or shadid thand ka hume bilkul be koi andaza nh tha. Jab wahan puhanchay tu barish k qatray ahista ahista snowflakes main tabdeel hotay gay.
Hum Kaghan se agay bh jana chahtay the magar mosaam ki shidat ki waje se kaghan tak he mehdod rhna para aur Naran jaa nahi the sakte ku k Naran me 10ft baraf ki teh lgi hui thi, jahan Cultus kya; 4×4 b shayd na pohnch saky.
Bhook lagi thi, Baraf pad rhi thi, bbq ka chicken mojood tha. Roadside par ik jagha pathar ikhtay kiye, koiyle(Coal) rkhe. Baraf-bari me aag jalana aik challenge tha magar hmen’ krna tha, himmat nhi haari.
Kafi dair tk lagay rhe akhir aag jal gai magar ab is aag ko jalaye rkhna bhi aik challenge tha.
Gari se shades(car blinds) nikale or us se aag k upar aik shelter bana dia. Sath he fire-cylinder par Abdul Rehman umda’ qisam ki chaye(tea) bana raha tha. Hum dono chezen krne main kamyab rhe. Khana bhi khaya or chaye bh pee. Batata chlon jis mosam main humne wahan jane ka plan kia tha tab whan humaray ilawa shaid koi or mojood nhi tha. Ye March 2019 k first week ki baat he. Haseen nazaron ko apni ankhoon main save kia or wapis Bissian gaoun ki trf nikl pdy. Rat stay krne k bad subha 5 bje Lahore wapis rawana howe.
Ye sab kuch aik sudden plan tha jo Gujrawala main nashta krne se Kaghan main bbq krne tak puhanch gya.
If you have a story to share, do let us know at [email protected] and we’ll feature you!
